Аргентина терма жамоаси 31 май куни Жаҳон чемпионлиги унвонини ҳимоя қилишга тайёргарлик кўриш учун АҚШга етиб борди, деб хабар бермоқда AP.
ЖЧ-2026 финал босқичини аргентиналиклар 16 июнь куни «Канзас-Сити Чифс» клубининг уй аренаси ҳисобланган «Эрроухед Стэдиум»да Жазоир терма жамоасига қарши ўйин билан бошлашади.
Қизиқарли тафсилотлар:
-
Рамзий рейс: Футболчиларни олиб келган Aerolineas Argentinas авиакомпаниясининг чартер рейси 1978 рақами остида учди. Бу 1978 йилги Жаҳон чемпионатидаги илк зафарларига бўлган ҳурмат белгисидир.
-
Самолёт кўриниши: Airbus A330 лайнерининг думида миллий жамоанинг кўк-оқ чизиқлари фонида Лионель Мессининг 10-рақамли либоси тасвирланган, учта олтин юлдуз эса Аргентинанинг уч карра чемпионлигини англатади.
-
Қароргоҳ: Аргентина Канзас-Сити шаҳрини ўз қароргоҳи сифатида танлаган тўртта жамоадан биринчиси бўлди. Шу ҳафта ичида Нидерландия, Англия ва Жазоир терма жамоалари ҳам шу ҳудудга етиб келиши кутилмоқда.
-
Жойлашув: Месси ва унинг жамоадошлари Канзас-Сити маркази яқинидаги Origin меҳмонхонасида истиқомат қилишади. Меҳмонхона атрофида қўшимча хавфсизлик чоралари кўрилган, бино ташқарисида эса «Альбиселесте» юлдузларининг улкан суратлари ўрнатилган.
Жамоа 1 июнь куни «Спортинг Канзас-Сити» (МЛС) клуби базасида илк тўлиқ машғулотини ўтказади. 7 июнь куни эса Гондурас билан ўртоқлик учрашуви режалаштирилган.
