Argentina terma jamoasi 31 may kuni Jahon chempionligi unvonini himoya qilishga tayyorgarlik ko‘rish uchun AQSHga yetib bordi, deb xabar bermoqda AP.
JCH-2026 final bosqichini argentinaliklar 16 iyun kuni «Kanzas-Siti Chifs» klubining uy arenasi hisoblangan «Errouxed Stedium»da Jazoir terma jamoasiga qarshi o‘yin bilan boshlashadi.
Qiziqarli tafsilotlar:
-
Ramziy reys: Futbolchilarni olib kelgan Aerolineas Argentinas aviakompaniyasining charter reysi 1978 raqami ostida uchdi. Bu 1978 yilgi Jahon chempionatidagi ilk zafarlariga bo‘lgan hurmat belgisidir.
-
Samolyot ko‘rinishi: Airbus A330 laynerining dumida milliy jamoaning ko‘k-oq chiziqlari fonida Lionel Messining 10-raqamli libosi tasvirlangan, uchta oltin yulduz esa Argentinaning uch karra chempionligini anglatadi.
-
Qarorgoh: Argentina Kanzas-Siti shahrini o‘z qarorgohi sifatida tanlagan to‘rtta jamoadan birinchisi bo‘ldi. Shu hafta ichida Niderlandiya, Angliya va Jazoir terma jamoalari ham shu hududga yetib kelishi kutilmoqda.
-
Joylashuv: Messi va uning jamoadoshlari Kanzas-Siti markazi yaqinidagi Origin mehmonxonasida istiqomat qilishadi. Mehmonxona atrofida qo‘shimcha xavfsizlik choralari ko‘rilgan, bino tashqarisida esa «Albiseleste» yulduzlarining ulkan suratlari o‘rnatilgan.
Jamoa 1 iyun kuni «Sporting Kanzas-Siti» (MLS) klubi bazasida ilk to‘liq mashg‘ulotini o‘tkazadi. 7 iyun kuni esa Gonduras bilan o‘rtoqlik uchrashuvi rejalashtirilgan.
