«Милан» аъзоси Кристиан Пулишич учун мавсумнинг иккинчи ярми омадсиз кечгани унинг терма жамоадаги мақомига ҳам таъсир қилди. АҚШ терма жамоаси бош мураббийи Маурисио Почеттино уни сардорлик боғичидан маҳрум қилди.
Эндиликда жамоани майдонга тажрибали Тим Рим сардор сифатида бошлаб тушади. Ҳозирда 38 ёшда бўлган футболчи охирги икки йилни «Шарлотт» клубида ўтказмоқда. Илгари у узоқ вақт Англияда фаолият юритган: аввалига «Болтон Уондерерс», сўнгра тўққиз йил давомида «Фулхэм» шарафини ҳимоя қилиб, 2024 йилда Лондон клубини тарк этган эди.
Эслатиб ўтамиз, Жаҳон чемпионати 11 июнь куни бошланади. АҚШ терма жамоаси ўз гуруҳида Парагвай, Австралия ва Туркия билан куч синашади.













