Бразилия терма жамоаси ҳужумчиси Пеленинг 1958 йилги Жаҳон чемпионати финалида кийган футболкаси «Sotheby's» аукционига қўйилади, деб хабар бермоқда «The New York Times».

Манбага кўра, лотнинг бошланғич нархи 6 миллион доллардан ошади. Аукцион 29 июндан 16 июлгача — 2026 йилги Жаҳон чемпионати финалидан уч кун олдин ўтказилади.

1958 йилги Жаҳон чемпионати финалида Бразилия терма жамоаси Швецияни мағлуб этган (5:2) ва 17 ёшли Пеле дубль қайд этган эди. Ўшандан бери у Жаҳон чемпионати финалида майдонга тушган ва гол урган энг ёш футболчи бўлиб қолмоқда.

Ҳозирги кунга қадар энг қиммат футбол футболкаси Диего Марадонанинг 1986 йилги Жаҳон чемпионатида кийган либоси ҳисобланади, у 2022 йилда аукционда 9,28 миллион долларга сотилган.