Англия миллий терма жамоаси собиқ футболчиси, ҳозирда эса футбол эксперти сифатида фаолият юритаётган Гари Линекер ЖЧ-2026 ўйинлари чипта нархлари ҳаддан ташқари қимматлиги борасида фикр билдирди.
«Чипта нархлари... Улар оддий мухлислар учун ҳамёнбоп бўладими? Мундиалларнинг энг катта қувончи — стадионларда Бразилия, Аргентина ва бошқа мамлакатлардан келган минглаб ашаддий ишқибозларни кўришдир. Бундай нархлар билан биз яна ўша муҳитни кўра оламизми? Бу мени қаттиқ хавотирга солмоқда», — дея собиқ футболчининг сўзларини келтиради iNews.
Эслатиб ўтамиз, Жаҳон чемпионати Шимолий Американинг учта давлати: АҚШ, Канада ва Мексикада бўлиб ўтади. Ушбу нуфузли турнир 11 июнь куни старт олади ва 19 июлга қадар давом этади. Мусобақанинг амалдаги ғолиби Аргентина терма жамоаси ҳисобланади.
