Англия терма жамоаси собиқ футболчиси Дэвид Бекхэм яқинлашиб келаётган футбол бўйича Жаҳон чемпионати ҳақида ўз фикрларини билдирди. Эслатиб ўтамиз, турнир 11 июндан 19 июлга қадар АҚШ, Канада ва Мексика майдонларида бўлиб ўтади.
ABC телеканалининг бу йилги турнирда кимнинг ғолиб бўлишини хоҳлаши ҳақидаги саволига Бекхэм шундай жавоб берди:
«Мен доим Англия деб айтаман. Айниқса, Жаҳон чемпионатида охирги марта зафар қучганимизга 60 йил тўлганини ҳисобга олсак, яна ғалаба қозонишнинг айни вақти келди».
«Жаҳон чемпионатларида доим кутилмаган совғалар кузатилади — қайсидир футболчи ёки қайсидир мамлакат кутилмаганда олдинги планга чиқиб олади. Мен Япония терма жамоасининг таркиби жуда кучли деб ҳисоблайман — улар турнирнинг ўзига хос яширин фаворитига айланишлари мумкин», — дея қўшимча қилди Бекхэм.
Маълумот учун, Англия терма жамоаси гуруҳ босқичида Панама, Хорватия ва Гана терма жамоаларига қарши баҳс олиб боради.
