Angliya terma jamoasi sobiq futbolchisi Devid Bekxem yaqinlashib kelayotgan futbol bo‘yicha Jahon chempionati haqida o‘z fikrlarini bildirdi. Eslatib o‘tamiz, turnir 11 iyundan 19 iyulga qadar AQSH, Kanada va Meksika maydonlarida bo‘lib o‘tadi.
ABC telekanalining bu yilgi turnirda kimning g‘olib bo‘lishini xohlashi haqidagi savoliga Bekxem shunday javob berdi:
«Men doim Angliya deb aytaman. Ayniqsa, Jahon chempionatida oxirgi marta zafar quchganimizga 60 yil to‘lganini hisobga olsak, yana g‘alaba qozonishning ayni vaqti keldi».
«Jahon chempionatlarida doim kutilmagan sovg‘alar kuzatiladi — qaysidir futbolchi yoki qaysidir mamlakat kutilmaganda oldingi planga chiqib oladi. Men Yaponiya terma jamoasining tarkibi juda kuchli deb hisoblayman — ular turnirning o‘ziga xos yashirin favoritiga aylanishlari mumkin», — deya qo‘shimcha qildi Bekxem.
Ma’lumot uchun, Angliya terma jamoasi guruh bosqichida Panama, Xorvatiya va Gana terma jamoalariga qarshi bahs olib boradi.
