Аргентина терма жамоаси бош мураббийи Лионель Скалони жамоа таркибида ўзгаришлар бўлиши мумкинлигини маълум қилди. «Альбиселесте» ўртоқлик учрашувида Гондурасни мағлуб этди (2:0). Жароҳатдан сўнг ҳали оптимал спорт формасига кириб улгурмаган Лионель Месси, Хулиан Альварес ва Николас Пас ушбу баҳсда майдонга тушишмади.

«Таркибимиз ҳали 100 фоизга аниқлаб бўлинмаган. Эҳтимол, яна битта ўзгариш киритармиз. Нико Пас тайёр эди ва бугун ўйнаши ҳам мумкин эди, Альварес борасида ҳам ҳеч қандай хавотир йўқ. Уларнинг ҳолати яхши. Таркибга яна кимни қўшишимиз мумкинлиги борасида ҳали бир қарорга келмадик. Хавотирга ўрин йўқ, бироқ ҳамма футболчиларимиз ҳам идеал ҳолатда эмас — айримлари ҳали тўлиқ тикланиб улгурмади. Олдинда яна бир ўртоқлик учрашуви бор, вазиятни баҳолаймиз. Якуний қарорни қабул қилишга шошилмаймиз — сешанбагача кутамиз», — деди Скалони матбуот анжуманида.

10 июнь куни амалдаги жаҳон чемпионлари Исландияга қарши ўртоқлик учрашувида майдонга тушишади.