Сенегал футбол федерацияси (FSF) АҚШ аэропортида терма жамоа футболчилари текширувдан ўтказилгани билан боғлиқ ҳолат юзасидан расмий баёнот билан чиқди. Аввалроқ ижтимоий тармоқларда Сенегал терма жамоаси футболчилари ва мураббийлар штаби аъзолари кўрикдан ўтказилаётгани акс этган видео тарқалган эди. Айрим ОАВнинг тасдиқланмаган маълумотларига кўра, футболчилар гиёҳванд моддалар мавжудлиги бўйича текширилган.

«Ижтимоий тармоқларда Сенегал терма жамоаси футболчилари ва ходимлари аэропортнинг учиш-қўниш йўлагида текширувдан ўтаётгани акс этган видеолар тарқалгани муносабати билан тушунмовчиликларнинг олдини олиш мақсадида қуйидагиларни маълум қиламиз.

Айрим хабарларда айтилганидек, текширув жамоа Сан-Антониога етиб келганида эмас, балки Роли аэропортидан АҚШ ичидаги парвоз олдидан ўтказилган. Сенегал терма жамоасини олиб келган автобус Роли шаҳридаги меҳмонхонадан тўғридан-тўғри аэропортнинг учиш-қўниш йўлагига йўл олган. Ушбу тартиб футболчилар ва жамоа ходимларига терминал ва кутиш залларига кирмасдан, самолётга чиқиш олдидан хавфсизлик ва полиция текширувларидан ўтиш имконини берди.

Бу чора, аввало, логистикани оптималлаштириш мақсадида қўлланилди. Барча жамоанинг Сан-Антониога хусусий рейсга чиқиш жараёнини соддалаштиришни истаган. Шуни таъкидлаймизки, ушбу тартиб амалдаги авиация хавфсизлиги қоидаларига тўлиқ мувофиқ ҳолда ўтказилган ва ҳеч қандай нохуш ҳолат қайд этилмаган. Ролидан Сан-Антониога бўлган парвоз юқори даражадаги шароитларда амалга оширилди», — дейилади FSF баёнотида.