«Лос-Анжелес» ва Жанубий Корея терма жамоаси ҳужумчиси Сон Хын Мин ўзининг машҳур лақаби ҳақида фикр билдирди. 33 ёшли футболчи, айниқса мексикалик мухлислар уни португалиялик Криштиану Роналдуга қиёслаб, «Соналду» деб аташни жуда яхши кўришларини тан олди.
«Лос-Анжелесда мексикаликлар жуда кўп. Мен уларнинг эҳтиросини ҳис қиламан, менга жуда илиқ муносабатда бўлишади, бунинг учун улардан миннатдорман. Аммо йўқ, бундай лақабга лойиқ бўлиш учун етарлича иш қилдим деб ўйламайман», — дея Соннинг сўзларини келтиради The Touchline.
Эслатиб ўтамиз, ҳужумчи Лондоннинг «Тоттенхэм» клубидаги ўн йиллик фаолиятидан сўнг, ўтган йилнинг август ойида МЛСга кўчиб ўтган эди. Сон Жанубий Корея таркибида ЖЧ-2026 гуруҳ босқичи доирасида Мексика терма жамоасига қарши майдонга тушади. Мексика — мундиалга мезбонлик қилаётган учта давлатдан биридир.
