«Los-Anjeles» va Janubiy Koreya terma jamoasi hujumchisi Son Xin Min o‘zining mashhur laqabi haqida fikr bildirdi. 33 yoshli futbolchi, ayniqsa meksikalik muxlislar uni portugaliyalik Krishtianu Ronalduga qiyoslab, «Sonaldu» deb atashni juda yaxshi ko‘rishlarini tan oldi.
«Los-Anjelesda meksikaliklar juda ko‘p. Men ularning ehtirosini his qilaman, menga juda iliq munosabatda bo‘lishadi, buning uchun ulardan minnatdorman. Ammo yo‘q, bunday laqabga loyiq bo‘lish uchun yetarlicha ish qildim deb o‘ylamayman», — deya Sonning so‘zlarini keltiradi The Touchline.
Eslatib o‘tamiz, hujumchi Londonning «Tottenxem» klubidagi o‘n yillik faoliyatidan so‘ng, o‘tgan yilning avgust oyida MLSga ko‘chib o‘tgan edi. Son Janubiy Koreya tarkibida JCH-2026 guruh bosqichi doirasida Meksika terma jamoasiga qarshi maydonga tushadi. Meksika — mundialga mezbonlik qilayotgan uchta davlatdan biridir.
