Шотландия терма жамоаси ярим ҳимоячиси Скотт Мактоминай ошқозон-ичак тизимидаги безовталикдан сўнг тўлиқ соғайди ва Жаҳон чемпионатининг 1-турида майдонга тушиши мумкин. Бу ҳақда матбуот анжуманида шотландлар бош мураббийи Стив Кларк маълум қилди.
«У тўлиқ соғайди ва майдонга тушишга тайёр», — дея жавоб берди Кларк жамоа етакчисининг соғлиғи ҳақидаги саволга.
Шотландияда Мактоминай терма жамоани 1998 йилдан буён илк бор Жаҳон чемпионатига олиб чиққан Данияга қарши кечган ҳал қилувчи ўтиш ўйинидаги (4:2) чалқанча услубда (акробатик тарзда) урган ажойиб голидан сўнг ҳақиқий қаҳрамонга айланган эди.
Бироқ Кларк бор масъулиятни фақат бир футболчининг зиммасига юклашни истамаслигини билдирди: «Менимча, бу ерда менинг 26 та суперюлдузим бор. Бутун масъулиятни бир кишига юклаш адолатдан эмас. Охирги 7 йил ичида эришган барча ютуқларимиз жамоага, жамоавий бирдамликка ва ҳар бир аъзонинг керакли пайтда ўз ҳиссасини қўшганига асосланган».
«Охирги 2 та йирик турнир биз кутгандек ўтмади. Аммо ҳозир бизда яна бир имконият бор ва бу жамоани йирик мусобақаларга олиб чиқишда давом этаётган футболчиларнинг хизматидир. Бу ерда бўлиш ажойиб, лекин биз ўзига хос натижага эришмоқчимиз», — дея таъкидлади Кларк.
Гаитига қарши ўйин 14 июнь куни бўлиб ўтади. Гаити билан баҳсдан сўнг шотландларни анча жиддий синовлар — ФИФА рейтингида еттинчи ва олтинчи ўринларни эгаллаб турган Марокаш ҳамда Бразилия терма жамоаларига қарши ўйинлар кутмоқда.
