АҚШ терма жамоаси 2026 йилги жаҳон чемпионати гуруҳ босқичининг 1-тур учрашувида Парагвай устидан 4:1 ҳисобида ғалаба қозонди. Ўйин Лос-Анжелесдаги «СоФи Стэдиум» аренасида бўлиб ўтди.
7-дақиқада Дамиан Бобадильянинг автоголи эвазига америкаликлар олдинга чиқиб олишди. Учрашувнинг 31-дақиқасида «Монако»нинг америкалик ҳужумчиси Фоларин Балогун жамоасининг устунлигини икки баробарга оширди, 45+5 дақиқада эса дубль қайд этиб, ҳисобни йирик кўринишга келтирди.
Парагвайликлар иккинчи бўлим ўрталарида битта тўп киритишга муваффақ бўлишди — захирадан майдонга тушган ярим ҳимоячи Маурисиу ўз номига гол ёздириб қўйди. Финал ҳуштаги чалинишидан олдин АҚШ ярим ҳимоячиси Жованни Рейна оёғининг ташқи томони билан зарба бериб, якуний ҳисобни ўрнатди.
АҚШ 3 очко тўплаб, D гуруҳида биринчи ўринга кўтарилиб олди. Парагвайликлар эса охирги ўринда. Ушбу гуруҳнинг Австралия ва Туркия ўртасидаги иккинчи ўйини якшанба, 14 июн куни бўлиб ўтади.
2026 йилги футбол бўйича жаҳон чемпионати 11 июндан 19 июлга қадар Канада, АҚШ ва Мексикада бўлиб ўтмоқда. Турнирда 48 та жамоа иштирок этяпти. Плей-офф босқичига гуруҳларда биринчи ва иккинчи ўринларни эгаллаган терма жамоалар, шунингдек, учинчи ўринни банд этган энг яхши саккизта терма жамоа йўл олади.
