Туркия терма жамоаси ва Мадриднинг «Реал» клуби ярим ҳимоячиси Арда Гюлер Жаҳон чемпионати гуруҳ босқичи 1-туридан ўрин олган Австралияга қарши баҳсдаги (0:2) мағлубият ҳақида ўз фикрлари билан ўртоқлашди.

«Авваламбор, Австралияни табриклайман. Улар ўз имкониятларидан фойдалана олишди, биз эса йўқ.

Аммо очиғини айтсам, айрим ҳакамлик қарорларига кўникиш қийин бўлди. Шундай вазиятлар бўлдики, орамиздан кўпчилик рақиб томонидан қўл билан ўйин содир этилди деб ҳисоблади, бироқ учрашув давом эттирилди. Мен буни мағлубиятимизнинг ягона сабаби демоқчи эмасман, лекин бундай лаҳзалар ўйин тизгинини ўзгартириб юбориши мумкин.

Ҳакам вазиятни бошқача кўрди ва у билан ҳамфикр бўлмасак-да, бу қарорни ҳурмат қилишимиз керак. Якунда эса хатони ўзимиздан излашимиз лозим. Жамоамиз етарлича вазиятлар ярата олмади, ҳимояда ҳам яхши ўйнамадик ва Австралия бизни бунинг учун жазолади.

Мухлислар хафа бўлишга тўла ҳақли. Биз ҳам хафамиз. Бундан тўғри хулоса чиқарамиз, майдонга янада кучлироқ бўлиб қайтамиз ва ушбу натижа турнирдаги тақдиримизни ҳал қилиб қўймаслиги учун ҳаракат қиламиз», — дея Гюлернинг сўзларини Х ижтимоий тармоғидаги Rising Stars XI аккаунти келтирмоқда.