Turkiya terma jamoasi va Madridning «Real» klubi yarim himoyachisi Arda Gyuler Jahon chempionati guruh bosqichi 1-turidan o‘rin olgan Avstraliyaga qarshi bahsdagi (0:2) mag‘lubiyat haqida o‘z fikrlari bilan o‘rtoqlashdi.

«Avvalambor, Avstraliyani tabriklayman. Ular o‘z imkoniyatlaridan foydalana olishdi, biz esa yo‘q.

Ammo ochig‘ini aytsam, ayrim hakamlik qarorlariga ko‘nikish qiyin bo‘ldi. Shunday vaziyatlar bo‘ldiki, oramizdan ko‘pchilik raqib tomonidan qo‘l bilan o‘yin sodir etildi deb hisobladi, biroq uchrashuv davom ettirildi. Men buni mag‘lubiyatimizning yagona sababi demoqchi emasman, lekin bunday lahzalar o‘yin tizginini o‘zgartirib yuborishi mumkin.

Hakam vaziyatni boshqacha ko‘rdi va u bilan hamfikr bo‘lmasak-da, bu qarorni hurmat qilishimiz kerak. Yakunda esa xatoni o‘zimizdan izlashimiz lozim. Jamoamiz yetarlicha vaziyatlar yarata olmadi, himoyada ham yaxshi o‘ynamadik va Avstraliya bizni buning uchun jazoladi.

Muxlislar xafa bo‘lishga to‘la haqli. Biz ham xafamiz. Bundan to‘g‘ri xulosa chiqaramiz, maydonga yanada kuchliroq bo‘lib qaytamiz va ushbu natija turnirdagi taqdirimizni hal qilib qo‘ymasligi uchun harakat qilamiz», — deya Gyulerning so‘zlarini X ijtimoiy tarmog‘idagi Rising Stars XI akkaunti keltirmoqda.