Эрон терма жамоаси бош мураббийи Амир Галенои ЖЧ-2026 гуруҳ босқичи доирасида Янги Зеландияга қарши кечган ўйиндан (2:2) сўнг дарҳол жамоага АҚШни тарк этиш буюрилганини маълум қилди.

«Бизга ҳатто тикланиш учун ҳам вақт беришмади. Ўйиндан кейин бизга: "Сизлар зудлик билан кетишингиз керак", дейишди. Тикланиш вақти — бу жуда муҳим, аммо бизга самолётга ўтириб, Тихуанага қайтишни буюришди. Бу бизни жуда хавотирга солмоқда.

Тўғрисини айтсам, нега бизга бундай муносабатда бўлишаётганини тушунмаяпмиз. Бу менга ғалати туюлмоқда. Қарорлар ФИФАда эмас, умуман бошқа жойда қабул қилиняпти. Биз ўйиндан икки кун олдин келишимиз, ўйиндан кейин тикланиш учун тунаб қолишимиз ва эртаси куни тушликка яқин базага қайтишимиз керак эди.

Нега бундай бўлаётгани ҳақида ҳеч қандай тасаввурга эга эмасмиз. Ушбу жаҳон чемпионатида бизнинг жамоамизни ҳамма жамоадан кўпроқ камситишмоқда», — деди Галенои.

Шу билан бирга, мураббий жамоага АҚШ ҳудудини зудлик билан тарк этишни айнан ким буюрганига аниқлик киритмаган.