Eron terma jamoasi bosh murabbiyi Amir Galenoi JCH-2026 guruh bosqichi doirasida Yangi Zelandiyaga qarshi kechgan o‘yindan (2:2) so‘ng darhol jamoaga AQSHni tark etish buyurilganini ma’lum qildi.
«Bizga hatto tiklanish uchun ham vaqt berishmadi. O‘yindan keyin bizga: "Sizlar zudlik bilan ketishingiz kerak", deyishdi. Tiklanish vaqti — bu juda muhim, ammo bizga samolyotga o‘tirib, Tixuanaga qaytishni buyurishdi. Bu bizni juda xavotirga solmoqda.
To‘g‘risini aytsam, nega bizga bunday munosabatda bo‘lishayotganini tushunmayapmiz. Bu menga g‘alati tuyulmoqda. Qarorlar FIFAda emas, umuman boshqa joyda qabul qilinyapti. Biz o‘yindan ikki kun oldin kelishimiz, o‘yindan keyin tiklanish uchun tunab qolishimiz va ertasi kuni tushlikka yaqin bazaga qaytishimiz kerak edi.
Nega bunday bo‘layotgani haqida hech qanday tasavvurga ega emasmiz. Ushbu jahon chempionatida bizning jamoamizni hamma jamoadan ko‘proq kamsitishmoqda», — dedi Galenoi.
Shu bilan birga, murabbiy jamoaga AQSH hududini zudlik bilan tark etishni aynan kim buyurganiga aniqlik kiritmagan.
