Аргентина терма жамоаси бош мураббийи Лионель Скалони жамоанинг турнирдаги стартига бағишланган матбуот анжуманида нутқ сўзлади. 17 июнь куни Аргентина Жазоир билан тўқнаш келади.

«Биринчи тур ҳар доим ҳам терма жамоаларнинг ҳақиқий кучини кўрсатавермайди. Испания мисолида кўрадиган бўлсак — жамоа Кабо-Верде билан дуранг ўйнади, ваҳоланки бемалол ғалаба қозониши мумкин эди. Бу қийин рақиб. Даража ўсган», — деди у.

«Жазоир — яхши жамоа. Уларда тезкор ҳужумчилар, яхши жисмоний ҳолат ва техника бор. Бу жамоа билан эҳтиёт бўлиш ва уларни ҳурмат қилиш керак. Улар бизга албатта қийинчилик туғдиришади. Натижага эришиш учун яхши ўйин кўрсатишимиз лозим».

Скалони, шунингдек, турнирга кичик жароҳатлар билан етиб келган икки футболчи — Лионель Месси ва Хулиан Альвареснинг ҳолати ҳақида ҳам тўхталиб ўтди. Мураббийнинг сўзларига кўра, жамоа сардори катта эҳтимол билан асосий таркибда майдонга тушади.