Жаҳон чемпионати “K” гуруҳи 1-туридан ўрин олган Колумбия – Ўзбекистон учрашуви олдидан Жанубий Америка қитъаси вакиллари бош мураббийи Нестор Лоренсо рақибни менсимаслик қимматга тушиши ҳақида огоҳлантирди. Унинг таъкидлашича, мундиалнинг илк ҳафтаси мусобақада кучсиз жамоанинг ўзи йўқлигини кўрсатиб берди.

2022-йилги Жаҳон чемпионатини ўтказиб юборган колумбияликлар бу сафарги мусобақага фаворитлардан бири сифатида етиб келган. Бироқ Лоренсо мундиалда дебют қилаётган Ўзбекистон миллий жамоасига паст баҳо бериш катта хато бўлишини айтди.

“Жаҳон чемпионати бизга шуни кўрсатмоқдаки, бу ерда кичик жамоалар йўқ ва ҳеч кимни менсимаслик керак эмас. Ўзбекистон кучли жамоаларга қарши жуда яхши натижалар қайд этган. Уларнинг ажойиб мураббийи бор, таркибида эса юқори савиядаги тўрт-беш нафар футболчи мавжуд. Энг муҳими, бу жамоа жуда тартибли ва қандай ўйнашни аниқ билади”, деди Лоренсо ўйиндан олдин бўлиб ўтган матбуот анжуманида.

Маълумот учун, Ўзбекистон терма жамоаси ҳамда Колумбия ўртасидаги баҳс Тошкент вақти билан 18 июнь куни тонги 7:00 да бошланади.