Португалия терма жамоаси ҳужумчиси Криштиану Роналду ЖЧ-2026 гуруҳ босқичидаги Конго ДРга қарши баҳснинг биринчи бўлимида тўпга атиги 16 марта тегинди.
Whoscored маълумотига кўра, бу Португалия терма жамоасининг барча майдон футболчилари орасидаги энг паст кўрсаткич бўлди. Қизиғи шундаки, жамоа дарвозабони Диогу Кошта ҳам биринчи тайм давомида тўпга 16 марта тегинган.
Португалия терма жамоасининг ягона голини 6-дақиқада бош билан Жоау Невеш киритди. Конго эса биринчи бўлимга қўшиб берилган вақтнинг бешинчи дақиқасида Йоан Виссанинг голи орқали ҳисобни тенглаштирди.
41 ёшли Роналду учун мазкур мундиал фаолиятидаги олтинчи жаҳон чемпионати ҳисобланади. У бу борада Лионель Месси билан биргаликда жаҳон рекордига эгалик қилмоқда. ЖЧ-2026 давомида бу кўрсаткичга Мексика терма жамоаси дарвозабони Гильермо Очоа ҳам етиб олиши мумкин.













