Portugaliya terma jamoasi hujumchisi Krishtianu Ronaldu JCH-2026 guruh bosqichidagi Kongo DRga qarshi bahsning birinchi bo‘limida to‘pga atigi 16 marta tegindi.
Whoscored ma’lumotiga ko‘ra, bu Portugaliya terma jamoasining barcha maydon futbolchilari orasidagi eng past ko‘rsatkich bo‘ldi. Qizig‘i shundaki, jamoa darvozaboni Diogu Koshta ham birinchi taym davomida to‘pga 16 marta tegingan.
Portugaliya terma jamoasining yagona golini 6-daqiqada bosh bilan Joau Nevesh kiritdi. Kongo esa birinchi bo‘limga qo‘shib berilgan vaqtning beshinchi daqiqasida Yoan Vissaning goli orqali hisobni tenglashtirdi.
41 yoshli Ronaldu uchun mazkur mundial faoliyatidagi oltinchi jahon chempionati hisoblanadi. U bu borada Lionel Messi bilan birgalikda jahon rekordiga egalik qilmoqda. JCH-2026 davomida bu ko‘rsatkichga Meksika terma jamoasi darvozaboni Gilyermo Ochoa ham yetib olishi mumkin.













