«Barselona»ning yozgi transferlaridan biri Jesse Bisivu «Barsa Atletik» safida «Sabadel»ga qarshi Kataloniya kubogi finalida to‘pig‘idan jiddiy jarohat oldi.
18 yoshli belgiyalik futbolchi uchrashuvning dastlabki o‘n daqiqasida jarohatlanib, maydonni zambilda tark etdi. Bu holat uning ahvoli borasida jiddiy xavotirlarga sabab bo‘ldi.
Diario Sport ma’lumotiga ko‘ra, dastlabki tekshiruvlar suyak sinishi holatini istisno qilgan. «Barselona» futbolchini bugun yana qo‘shimcha tibbiy ko‘rikdan o‘tkazib, jarohatning qay darajada jiddiy ekanini aniqlaydi.
Shuningdek, Bisivu qo‘ltiqtayoqda yurgan holda ham ko‘ringan.
Jesse Bisivu joriy mavsumda «Barselona» asosiy jamoasi tizimida muhim o‘rin tutishi kutilmoqda. Shu bois, agar tibbiy tekshiruv natijalari kutilganidan yomonroq chiqsa, bu ham futbolchining o‘zi, ham kataloniyaliklar uchun jiddiy yo‘qotish bo‘lishi mumkin.
