«Барселона»нинг ёзги трансферларидан бири Жессе Бисиву «Барса Атлетик» сафида «Сабадель»га қарши Каталония кубоги финалида тўпиғидан жиддий жароҳат олди.
18 ёшли бельгиялик футболчи учрашувнинг дастлабки ўн дақиқасида жароҳатланиб, майдонни замбилда тарк этди. Бу ҳолат унинг аҳволи борасида жиддий хавотирларга сабаб бўлди.
Diario Sport маълумотига кўра, дастлабки текширувлар суяк синиши ҳолатини истисно қилган. «Барселона» футболчини бугун яна қўшимча тиббий кўрикдан ўтказиб, жароҳатнинг қай даражада жиддий эканини аниқлайди.
Шунингдек, Бисиву қўлтиқтаёқда юрган ҳолда ҳам кўринган.
Жессе Бисиву жорий мавсумда «Барселона» асосий жамоаси тизимида муҳим ўрин тутиши кутилмоқда. Шу боис, агар тиббий текширув натижалари кутилганидан ёмонроқ чиқса, бу ҳам футболчининг ўзи, ҳам каталонияликлар учун жиддий йўқотиш бўлиши мумкин.
