Аргентина терма жамоаси ҳужумчиси Лионель Мессининг отаси Хорхе Мессининг соғлиги ҳақида тарқалган миш-мишлар юзасидан унинг оиласи расмий баёнот берди.

Аввалроқ айрим ОАВларда Месси ЖЧ-2026 гуруҳ босқичидаги Жазоирга қарши баҳсда (3:0) биринчи голини урганидан кейин отасининг касаллиги сабаб кўз ёши тўккани ҳақида хабарлар тарқалган эди.

Баёнотда шундай дейилади:

«Мессилар оиласи шуни маълум қиладики, айни пайтда Хорхе Месси соғлиғи билан боғлиқ муайян муаммоларга дуч келмоқда. Ҳозирда у шифокорлар назорати остида бўлиб, тикланиш жараёнини ўтамоқда ва ижобий натижалар намоён қилмоқда.

Сўнгги соатларда тарқалган хабарлар, миш-мишлар ва турли тахминлар муносабати билан оила айрим шахсларнинг ўта шахсий оилавий масалани муҳокама қилишда етарли даражада ҳурмат, одоб ва сезгирлик кўрсатмаганидан қаттиқ норози эканини билдиради.

Шунингдек, оила Хорхе Мессининг аҳволи ҳақида аниқ ва ишончли маълумотларга фақат унинг энг яқин қариндошлари эга эканини таъкидлайди. Шу сабабли оила ёки унинг расмий каналларидан ташқари манбалар томонидан тарқатилган ҳар қандай версия, баёнот ёки маълумот ҳақиқат сифатида қабул қилинмаслиги керак.

Бундай вазиятда барчадан масъулият, эҳтиёткорлик ва инсонийликни сақлашни сўраймиз.

Инсон саломатлиги ва унинг яқинларининг руҳий хотиржамлиги турли тахминлар ёки масъулиятсиз медиа эътибори мавзусига айланмаслиги лозим. Биз қўллаб-қувватлаш, ҳурмат ва ғамхўрлик билдирилган барча хабарлар учун самимий миннатдорчилик билдирамиз ҳамда ушбу жараён давомида Хорхе ва унинг оиласининг шахсий ҳаётига ҳурмат билан муносабатда бўлишни сўраймиз.

Муҳим янгиликлар бўлган тақдирда, улар оила томонидан тегишли расмий каналлар орқали эълон қилинади. Тушунганингиз учун раҳмат».

Ушбу баёнотни The Touchline саҳифаси X ижтимоий тармоғида эълон қилди.