Мадриднинг «Реал» клуби Италиянинг «Комо» клуби билан ярим ҳимоячи Николас Паснинг кейинги тақдирини муҳокама қилмоқчи. Бу ҳақда нуфузли инсайдер Фабрицио Романо хабар бермоқда.
Манбанинг маълум қилишича, кейинги ҳафтада томонлар аргентиналик футболчи бўйича келишув тузилмасини ўзгартириш борасида музокаралар ўтказишади. «Қироллик клуби» футболчини биринчи навбатда қайта сотиб олиш ҳуқуқига эга.
21 ёшли ярим ҳимоячининг ўзи кейинги мавсумда ҳам амалдаги жамоасида қолишни истамоқда.
Якунланган мавсумда Пас «Комо» таркибида 40 та учрашувда майдонга тушди. Ярим ҳимоячи ўз ҳисобига 13 та гол ва 7 та голли узатмани ёздириб қўйди.
