Нидерландия терма жамоаси бош мураббийи Рональд Куман 1/16 финал босқичида ўз жамоаси учун қайси рақиб қулайроқ эканлигини танлай олмади.

«Учар голландлар» ЖЧ–2026 гуруҳ босқичи иккинчи турида Швеция терма жамоасини 5:1 ҳисобида тор-мор этишди ва бу орқали мусобақанинг плей-офф босқичи йўлланмасини амалда нақд қилишди. Катта эҳтимол билан, «оловранглилар»нинг 1/16 финалдаги рақиби ё Бразилия, ёки Марокаш терма жамоаси бўлади.

«Бразилия ёки Марокаш? Менда ҳеч қандай танлов йўқ. Ушбу жамоалардан бири иккинчисидан сезиларли даражада кучли деб айта олмайман. Улар гуруҳдаги ўзаро ўйинда ҳам бежиз дуранг (1:1) ўйнашмади. Марокаш биринчи бўлимда ажойиб ҳаракат қилган бўлса, Бразилия иккинчи бўлимда фаоллик кўрсатди», — дея The Touchline нашри Куманнинг сўзларини келтиради.

Ҳозирда Нидерландия ўз гуруҳида 4 очко билан пешқадамлик қилмоқда ва урилган голлар эвазига Японияни ортда қолдирмоқда. Куман шогирдлари гуруҳдаги сўнгги ўйинни 26 июнь куни Тошкент вақти билан соат 02:00 да Тунисга қарши ўтказишади. Бразилия ва Марокаш ҳам ўз квартетларида 4 тадан очко жамғаришган, бироқ тўплар нисбати яхшироқ бўлгани туфайли Жанубий америкаликлар жадвалда биринчи ўринни эгаллаб туришибди.