Бразилия терма жамоаси ярим ҳимоячиси Лукас Пакета Жаҳон чемпионати гуруҳ босқичининг сўнгги туридан ўрин олган Шотландияга қарши ўйин олдидан Неймарнинг миллий жамоа машғулотларига қайтганига муносабат билдирди. Учрашув 25 июнь куни бўлиб ўтади.
Эслатиб ўтамиз, Неймар болдир мушагидан олган жароҳати сабабли турнир стартини ўтказиб юборган ва Марокаш (1:1) ҳамда Гаитига (3:0) қарши ўйинлар қайдномасига киритилмаган эди.
«Уни яна машғулотларда ва майдонда биз билан бирга кўрганимиздан барчамиз жуда хурсандмиз. Неймар — Бразилия терма жамоаси учун жуда муҳим футболчи. Унинг ушбу либосдаги фаолияти бой тарихга эга ва у ҳали ҳам жамоамизга жуда кўп нарса беришга қодир. Унинг қайтганидан мамнунмиз ва тез орада терма жамоага ёрдам бера олишига умид қиламиз», — деди Пакета Шотландия билан ўйин олдидан ўтказилган матбуот анжуманида.
Икки турдан сўнг Бразилия 4 очко билан «C» гуруҳида пешқадамлик қилмоқда. Учинчи турдаги ғалаба жамоага квартетда биринчи ўринни кафолатлайди. Агар Неймар майдонга тушишга тайёр бўлса, бу унинг 2023 йилдан бери Бразилия терма жамоаси сафидаги илк расмий учрашуви бўлади.
