Афсонавий швециялик футболчи Златан Ибрагимович ЖЧ-2026 гуруҳ босқичида Австрияга қарши баҳсда (2:0) тарихий рекорд ўрнатган Аргентина терма жамоаси сардори Лионель Месси ҳақида ўз фикрлари билан ўртоқлашди.

«Мен бунга ҳеч қачон шубҳа қилмаганман. Албатта, баъзида у оддий инсонга ўхшаб кўринади — масалан, пенальтини голга айлантира олмаганда. Кейин эса шундай лаҳзалар келадики, у инсонга ўхшамай қолади. Бу — Месси.

Ҳозирча бу унинг жаҳон чемпионати. У ҳали Иорданияга қарши ўйнаганича йўқ, шунинг учун ҳаммаси қандай тугашини билмайман. Икки ўйинда бешта гол... Менда эса икки жаҳон чемпионатида нолта гол бор, холос.

Мен у учун хурсандман ва шу руҳда давом этишига умид қиламан. Бир неча кундан кейин унинг туғилган куни, шунинг учун бу лаҳзалардан завқ олсин. Чунки биз ҳам унинг ўйинидан завқ олмоқдамиз. Шунчаки ақлбовар қилмас даражада, менда сўз йўқ», — деди Ибрагимович.

Австрияга қарши учрашувда Месси дубль қайд этиб, жаҳон чемпионатлари тарихидаги энг яхши тўпурарга айланди. У мундиаллардаги голлари сонини 18 тага етказиб, Мирослав Клозенинг 16 голлик рекордини ортда қолдирди.

Учрашувнинг 9-дақиқасида пенальтини аниқ ижро эта олмаган 38 ёшли ҳужумчи 38-дақиқада ҳисобни очди ва рекордни янгилади. Иккинчи бўлимга қўшиб берилган вақтда эса яна бир бор рақиб дарвозасини ишғол қилди.

Бундан ташқари, Месси аёллар ўртасидаги жаҳон чемпионатлари тарихида 17 гол урган бразилиялик Мартанинг натижасини ҳам ортда қолдирди. Шунингдек, у кетма-кет олтита жаҳон чемпионати учрашувида гол уриш орқали турнир тарихидаги рекордни такрорлади ва амалдаги жаҳон чемпионларининг плей-оффга чиқишини таъминлади.