Afsonaviy shvesiyalik futbolchi Zlatan Ibragimovich JCH-2026 guruh bosqichida Avstriyaga qarshi bahsda (2:0) tarixiy rekord o‘rnatgan Argentina terma jamoasi sardori Lionel Messi haqida o‘z fikrlari bilan o‘rtoqlashdi.

«Men bunga hech qachon shubha qilmaganman. Albatta, ba’zida u oddiy insonga o‘xshab ko‘rinadi — masalan, penaltini golga aylantira olmaganda. Keyin esa shunday lahzalar keladiki, u insonga o‘xshamay qoladi. Bu — Messi.

Hozircha bu uning jahon chempionati. U hali Iordaniyaga qarshi o‘ynaganicha yo‘q, shuning uchun hammasi qanday tugashini bilmayman. Ikki o‘yinda beshta gol... Menda esa ikki jahon chempionatida nolta gol bor, xolos.

Men u uchun xursandman va shu ruhda davom etishiga umid qilaman. Bir necha kundan keyin uning tug‘ilgan kuni, shuning uchun bu lahzalardan zavq olsin. Chunki biz ham uning o‘yinidan zavq olmoqdamiz. Shunchaki aqlbovar qilmas darajada, menda so‘z yo‘q», — dedi Ibragimovich.

Avstriyaga qarshi uchrashuvda Messi dubl qayd etib, jahon chempionatlari tarixidagi eng yaxshi to‘purarga aylandi. U mundiallardagi gollari sonini 18 taga yetkazib, Miroslav Klozening 16 gollik rekordini ortda qoldirdi.

Uchrashuvning 9-daqiqasida penaltini aniq ijro eta olmagan 38 yoshli hujumchi 38-daqiqada hisobni ochdi va rekordni yangiladi. Ikkinchi bo‘limga qo‘shib berilgan vaqtda esa yana bir bor raqib darvozasini ishg‘ol qildi.

Bundan tashqari, Messi ayollar o‘rtasidagi jahon chempionatlari tarixida 17 gol urgan braziliyalik Martaning natijasini ham ortda qoldirdi. Shuningdek, u ketma-ket oltita jahon chempionati uchrashuvida gol urish orqali turnir tarixidagi rekordni takrorladi va amaldagi jahon chempionlarining pley-offga chiqishini ta’minladi.