"Manchester Yunayted" akademiyasining eng iqtidorli futbolchilaridan biri hisoblangan 15 yoshli Jey Jey Gabriel "Barselona" bilan muzokara o‘tkazish uchun Ispaniyaga keldi. Bu haqda Britaniya OAV xabar bermoqda.
Bu voqea yosh futbolchi "Manchester Yunayted"dagi ro‘yxatdan chiqarilishini qat’iy talab qilganidan bir necha kun o‘tib sodir bo‘ldi. Klub esa uning so‘rovini rasman rad etgan.
Manbalarga ko‘ra, murabbiylar shtabi Gabrielni Angliya Liga kubogi 3-bosqichida "Brayton"ga qarshi o‘yin uchun qaydnomaga kiritishni rejalashtirgan edi. Agar u maydonga tushganida, "Manchester Yunayted" asosiy jamoasi tarixidagi eng yosh futbolchiga aylanishi mumkin edi. Biroq futbolchining klubni tark etish istagi bu rejalarni o‘zgartirdi.
Gabrielning kelajagi borasidagi dastlabki savollar o‘tgan hafta paydo bo‘lgan. O‘shanda u ijtimoiy tarmoqdagi sahifasidan barcha post va suratlarni o‘chirib tashlagan edi.
Keyinchalik futbolchi tomoni klub bilan kelishuvni bekor qilish bo‘yicha rasmiy so‘rov yubordi. "Manchester Yunayted" bu talabni rad etib, iqtidorli futbolchini saqlab qolishga urinmoqda.
Shunga qaramay, Gabriel va uning vakillarining Ispaniyaga safari futbolchining ketish ehtimolini oshirmoqda. Xabarlarga ko‘ra, u "Barselona"dan tashqari "Real" bilan ham muzokara o‘tkazishi mumkin.
Gabrielning "Manchester Yunayted" bilan kelishuvi joriy mavsum oxiriga qadar amal qiladi. Britaniya OAV ta’kidlashicha, u 6 oktyabr kuni 16 yoshga to‘lgach va Yevropa Ittifoqi fuqaroligi pasportiga ega bo‘lgani sabab, FIFA qoidalaridagi ayrim istisnolar orqali Ispaniya klublaridan biriga o‘tish imkoniyatiga ega bo‘lishi mumkin.
