Криштиану Роналдунинг опаси Катя Авейру Португалия терма жамоасининг Ўзбекистонга қарши 5:0 ҳисобидаги ғалабасидан кейин ижтимоий тармоқда пост қолдириб, укасининг атрофидаги танқидларга муносабат билдирди.

Эслатиб ўтамиз, 41 ёшли ҳужумчи мазкур учрашувда дубль қайд этди ва ўйиннинг энг яхши футболчиси деб топилди.

Катя Авейру ўз постида Роналдуга нисбатан айтилган танқидларни адолатсиз деб атаб, унинг футболдаги карьераси ва инсон сифатидаги фазилатларини ҳимоя қилди.

Унинг сўзларига кўра, охирги ҳафталарда Роналду ҳақида кескин танқидлар кучайган ва унинг фаолиятини камситишга уринганлар бўлган.

— Улар унинг карьерасини, меҳнати ва интизоми билан қурилган ҳаётини унутишга ҳаракат қилишди. У футбол, Португалия ва бутун дунё учун қилган ишларини бир зумда йўқ қилишни исташди, — дейди у.

Авейрунинг таъкидлашича, Роналду доимий босим остида ҳам ўз меҳнати билан жавоб қайтариб келган ва унинг фаолияти тасодиф эмас, балки меҳнат ва ирода натижаси ҳисобланади.

— Бу Криштиану Роналду. У доимо жавобни майдонда беради. У ҳеч қачон таслим бўлмайди. У доимо меҳнат билан жавоб қайтаради, — дейди у.