Франция терма жамоаси ярим ҳимоячиси Орельен Тчуамени Норвегия устидан қозонилган ғалабадан кейин ўз фикрларини билдирди. ЖЧ-2026 учинчи туридан ўрин олган учрашув 4:1 ҳисобида якунланди.

«Умуман олганда, гуруҳ босқичи якунларини ижобий баҳолаш мумкин, айниқса, ўйинимиз сифати ҳақида гапирадиган бўлсак. Гуруҳ босқичи тугади, энди энг муҳими бошланади. Биз ўзимизга ишонишимиз, кучли томонларимиздан фойдаланган ҳолда ўйнашимиз ва янада ўсишимиз керак.

Бизда ақл бовар қилмайдиган ҳужум потенциали бор, шу билан бирга ҳужумчиларимиз ҳимояда ҳам жамоага ёрдам беришмоқда. Бунинг эвазига яхши баланс сақланиб турибди. Биз фаол прессинг қилишни жуда хоҳлаймиз, аммо ўйинни бошқаришни янада яхшилашимиз керак — қачон босимни ошириш лозимлигини, қачон эса хотиржамроқ ҳаракат қилиш кераклигини тушунишимиз зарур. Ҳеч ким ўзини аяётгани йўқ, ҳар ким ўз ишини бажармоқда.

Дембелега келсак, бизда эмас, сизда шубҳалар бор эди! Биз унинг кимлигини ва нималарга қодирлигини жуда яхши биламиз. У доимо ҳазил қилади, кийиниш хонасидаги энг қувноқ йигитлардан бири. У учта гол урганида, бутун жамоа у учун чин дилдан хурсанд бўлди. Ҳозир биз бор эътиборимизни олдинда кутаётган ўйинларга қаратганмиз», — дея футболчининг сўзларидан иқтибос келтирмоқда RMC Sport.

Францияликлар 9 очко билан биринчи ўринда маррага етишди. Терма жамоанинг мусобақа 1/16 финалидаги рақиби кейинроқ маълум бўлади.