«Монако» вингери Магнес Аклиуш «Пари Сен-Жермен» клубига ўтишга жуда яқин турибди. Бу ҳақда TEAMtalk нашри маълумот тарқатди.

Манбанинг хабар беришича, Аклиуш «Ливерпуль» ва «Манчестер Юнайтед» клубларига ўзи учун устувор вазифа «ПСЖ»га ўтиш эканлигини маълум қилган. Парижликлар айни пайтда «Монако» билан тахминан 70 миллион евролик трансфер қиймати бўйича музокараларни фаол тарзда илгари суришмоқда. Қайд этилишича, Франция чемпиони монегасклар билан келишувга эришишига тўла ишонмоқда.

Якунланган мавсумда 24 ёшли Аклиуш барча мусобақаларда 43 та учрашувда майдонга тушиб, рақиблар дарвозасини 7 бор ишғол этди ва 11 та голли узатмани ўз ҳисобига ёздириб қўйди.

Маълумот учун, Аклиуш 2017 йилдан буён «Монако» тизимида фаолият юритиб келади.