Аргентина терма жамоаси дарвозасини қўриқлаётган Эмилиано Мартинес бармоғи сингани сабабли ҳанузгача оғриқ сезаётганини тан олди.
Эслатиб ўтамиз, дарвозабон ушбу жароҳатни «Астон Вилла» таркибида Европа Лигаси финали олдидан ўтказилган чигалёзди машғулотлари пайтида орттириб олган эди. Аргентиналик посбон АҚШ, Мексика ва Канада мезбонлик қилаётган мундиалда миллий терма жамоаси сафида майдонга тушиш учун операция қилдирмасликка қарор қилган.
«Мен ҳали ҳам одатдаги тартибда машғулот ўтказа олмаяпман, аммо кейинги ўйинда бармоқни ушлаб турувчи мосламасиз ўйнай оламан. У жуда ноқулай, сабаби у билан қўлқоп жуда кенг бўлиб қолади. Жароҳат мени безовта қиляпти, лекин майдондаги ўйинимга бунинг таъсири сезилишига йўл қўймасликка ҳаракат қиляпман», — дея дарвозабоннинг сўзларини келтиради TyC Sports.
Лионель Скалони шогирдлари ЖЧ-2026 гуруҳ босқичида учта ғалабани қўлга киритишди, Мартинес эса ўз дарвозасидан атиги битта тўп ўтказиб юборди. Энди 1/16 финалда аргентиналиклар Кабо-Верде терма жамоасига қарши баҳс олиб боради.
