«Ливерпуль» клуби «Вест Хэм» ярим ҳимоячиси Матеуш Фернандешни сотиб олиш имкониятларини кўриб чиқмоқда.
«Қизиллар» эҳтимолий трансфер шартларини билиш мақсадида португалиялик футболчи бўйича сўров юборишди, дея хабар беради инсайдер Фабрицио Романо. Мерсисайдликлар 21 ёшли футболчининг вакиллари билан ҳам алоқага чиқишган, бироқ ҳозирча иш дастлабки муҳокамалардан нарига ўтгани йўқ. Футболчига асосий даъвогар сифатида ҳанузгача «Манчестер Юнайтед» ва «Тоттенхэм» клублари қолмоқда, уларнинг қизиқиши анча жиддий тус олган.
«Вест Хэм» эса ўз юлдузи учун аввалгидек 80 миллион фунт стерлинг (тахминан 93 миллион евро) талаб қилмоқда. Ҳозирча ушбу молиявий талабни бажаришга тайёр бўлган харидор топилгани йўқ.
