Анхель ди Мария Аргентинанинг «Росарио Сентраль» клуби билан янги шартнома имзолади. 38 ёшли футболчининг ўз туғилиб ўсган шаҳри жамоаси билан тузган янги келишуви 2027 календарь йилининг бошига қадар мўлжалланган.

Эслатиб ўтамиз, «Росарио Сентраль» Анхель учун қадрдон клуб ҳисобланади. У ўтган ёзда Лиссабоннинг «Бенфика» клубидан собиқ жамоасига қайтиб келган эди. Бунгача у ўз фаолияти давомида Мадриднинг «Реал», «Манчестер Юнайтед», «ПСЖ» ва «Ювентус» клубларида тўп сурган.

Анхель Аргентина терма жамоасидаги фаолиятини 2024 йилда якунлаган эди, у миллий жамоада илк бор 2008 йилда дебют қилганди. Ди Мария «альбиселесте» таркибида 2022 йилги Жаҳон чемпиони ҳисобланади. Шу қишда у 39 ёшни қарши олади.