Португалия терма жамоаси ҳужумчиси Криштиану Роналду футбол бўйича 2026 йилги Жаҳон чемпионати 1/16 финалидан ўрин олган Хорватияга қарши баҳснинг (2:1) энг яхши ўйинчиси деб топилди. Учрашув Торонтодаги (Канада) «Би-Эм-О Филд» стадионида бўлиб ўтди. Баҳсни Эспен Эскос (Норвегия) бошчилигидаги ҳакамлар бригадаси бошқариб борди.
Роналду учрашувни бошланғич таркибда бошлади ва 81-дақиқада захирага олинди. У 68-дақиқада пенальтини аниқ амалга ошириб, ўйиндаги ҳисобни тенглаштирган эди. Учрашувнинг 61-дақиқасида эса ҳакамлар Криштианунинг голини офсайд сабабли бекор қилишганди.
Эндиликда португалияликлар 1/8 финал босқичида Испания терма жамоаси билан тўқнаш келишади.
ЖЧ-2026 мусобақаси 11 июндан 19 июлга қадар Канада, АҚШ ва Мексика майдонларида бўлиб ўтмоқда. Аргентина терма жамоаси амалдаги чемпион ҳисобланади.
