Кабо-Верде терма жамоаси дарвозабони Возинья 2026 йилги жаҳон чемпионатида тарихий натижа қайд этди.
Opta маълумотларига кўра, 40 ёшли посбон ушбу мундиал давомида жами 18 та сейв амалга оширган. Шуларнинг 8 таси Аргентинага қарши 1/16 финалдаги драматик баҳсда (2:3) қайд этилди. Шу тариқа, Возинья жаҳон чемпионатининг бир турнирида энг кўп сейв амалга оширган 40 ёш ва ундан катта дарвозабонлар қаторига кирди.
Бу кўрсаткич бўйича ундан юқори натижага фақат икки нафар афсонавий посбон эришган. Англиялик Питер Шилтон 1990 йилги мундиалда 28 та, италиялик Дино Дзофф эса 1982 йилги жаҳон чемпионатида 27 та сейв амалга оширган.
Кабо-Верде Аргентинага мағлуб бўлиб мусобақани тарк этган бўлса-да, тажрибали дарвозабон Возиньянинг ўйини турнирдаги энг ёрқинлардан бири сифатида эътироф этилди.
