Kabo-Verde terma jamoasi darvozaboni Vozinya 2026 yilgi jahon chempionatida tarixiy natija qayd etdi.
Opta ma’lumotlariga ko‘ra, 40 yoshli posbon ushbu mundial davomida jami 18 ta seyv amalga oshirgan. Shularning 8 tasi Argentinaga qarshi 1/16 finaldagi dramatik bahsda (2:3) qayd etildi. Shu tariqa, Vozinya jahon chempionatining bir turnirida eng ko‘p seyv amalga oshirgan 40 yosh va undan katta darvozabonlar qatoriga kirdi.
Bu ko‘rsatkich bo‘yicha undan yuqori natijaga faqat ikki nafar afsonaviy posbon erishgan. Angliyalik Piter Shilton 1990 yilgi mundialda 28 ta, italiyalik Dino Dzoff esa 1982 yilgi jahon chempionatida 27 ta seyv amalga oshirgan.
Kabo-Verde Argentinaga mag‘lub bo‘lib musobaqani tark etgan bo‘lsa-da, tajribali darvozabon Vozinyaning o‘yini turnirdagi eng yorqinlardan biri sifatida e’tirof etildi.
