Дортмунднинг «Боруссия» клуби ярим ҳимоячиси Феликс Нмеча «Манчестер Юнайтед»нинг трансфер рўйхатидан жой олган.

Журналист Тайрон Маршаллнинг берган маълумотига кўра, «қизил иблислар» яқиндагина Германия терма жамоаси сафида Жаҳон чемпионатидаги иштирокини якунлаган Нмеча бўйича батафсил маълумот тўплашмоқда.

Қайд этилишича, «Манчестер Юнайтед» спорт директори Жейсон Уилкокс футболчининг оиласи билан «Манчестер Сити» академияси давридан буён яхши алоқаларга эга. Нмечанинг энг устун жиҳатларидан бири сифатида унинг ажойиб жисмоний ҳолати ва майдоннинг катта қисмини назорат қила олиш қобилияти (жисмоний бақувватлиги) кўрсатилмоқда.

Шунга қарамай, ҳозирча «Манчестер Юнайтед» фақатгина футболчининг имкониятларини ўрганаётгани ва ҳеч қандай расмий музокараларга киришмагани таъкидланган.

Ортда қолган мавсумда 25 ёшли Нмеча «Боруссия» сафида барча мусобақаларда 42 та ўйинда майдонга тушиб, 5 та гол урди ва 3 та голли узатмани амалга оширди.