Жаҳон чемпионати — 2026 мусобақасининг 1/8 финалидан ўрин олган, Филадельфияда бўлиб ўтиши режалаштирилган Франция ва Парагвай терма жамоалари ўртасидаги учрашув аномал иссиқ об-ҳаво шароитида ўтиши мумкин.
L'Équipe нашрининг хабар беришича, синоптиклар башоратига кўра, сояда ҳарорат 36 даража иссиққача кўтарилади, ҳаво намлигини ҳисобга олганда эса иссиқлик бундан ҳам юқори даражада сезилади.
Нашрнинг ёзишича, иқлим назорати тизими билан жиҳозланмаган очиқ турдаги «Линкольн Файненшл Филд» стадионида нафақат футболчилар, балки томошабинлар хавфсизлиги ҳам жиддий хавотир уйғотмоқда. ФИФА ўйин давомида махсус сув ичиш танаффусларини ўз ичига олган салқинлатиш протоколларини ишга солишни режалаштирган. Бироқ FIFPRO футболчилар касаба уюшмаси ва олимлар бу чораларни етарли эмас деб ҳисоблашмоқда — улар ҳаво ҳарорати 28°C дан юқори бўлганда ўйинларни бошқа муддатга кўчиришни талаб қилишмоқда.
ФИФАнинг амалдаги қоидаларига кўра, агар нам термометр бўйича ҳарорат 32°C га етса, ўйин қолдирилиши мумкин. Бироқ айни дамда учрашувни кўчириш бўйича ҳеч қандай расмий қарор қабул қилинмаган.
