Англия миллий терма жамоаси 2026 йилги Жаҳон чемпионатининг 1/8 финал учрашуви олдидан футболчиларнинг етарли дам олишини таъминлаш мақсадида хавфсизлик чораларини кучайтирди.

Томас Тухель бошчилигидаги жамоа 6 июль куни “Эстадио Ацтека” стадионида Мексика терма жамоасига қарши майдонга тушади.

BBC хабарига кўра, Бундай эҳтиёт чоралари бежиз эмас. Аввалроқ Мексика мухлислари 1/16 финал учрашуви арафасида Эквадор терма жамоаси футболчилари истиқомат қилаётган меҳмонхона яқинида мушакбозлик уюштириб, уларнинг уйқусига халақит бергани ҳақида хабарлар тарқалган эди. Кейинчалик Мексика ўша баҳсда Эквадорни 2:0 ҳисобида мағлуб этганди.

Манбага кўра, Англия терма жамоаси футболчилар жойлашадиган меҳмонхона манзилини имкон қадар сир сақлашга уринмоқда. Шу билан бирга, ушбу маълумот ижтимоий тармоқлар орқали ошкор бўлиб кетишидан ҳам хавотир мавжуд.

Бундан ташқари, ўзи билан қулоқчин ёки уйқу ниқоби олиб келмаган футболчилар ҳамда жамоа ходимларига табиий уйқу воситалари ва оқ шовқин генераторлари тақдим этилиши режалаштирилган.