Испания терма жамоаси бош мураббийи Луис де ла Фуэнте бўлажак Жаҳон чемпионати 1/8 финал учрашувида Криштиану Роналдуни ким ва қандай тўхтатиб қолиши ҳақидаги саволга жавоб берди.

Испания ва Португалия терма жамоалари ўртасидаги баҳс душанба, 6 июль куни бўлиб ўтади. Ўйин Тошкент вақти билан соат 00:00да бошланиши режалаштирилган. Матбуот анжумани давомида журналистлар испаниялик мутахассисдан Пау Кубарси ва ундан 22 ёш катта бўлган Роналду ўртасидаги тўқнашувдан нималар кутаётгани ҳақида сўрашди.

«Рақибинг Роналду бўлса, ўзингни хотиржам ҳис қила олмайсан, бироқ мен ҳимоячиларимга тўлиқ ишонаман. Энг муҳими — ҳар иккала жарима майдончаси ичида ҳам рақибдан устун бўлиш, чунки ўйинлар тақдири айнан ўша ерда ҳал бўлади. Кубарси бўладими ёки Лапорт, иккаласи ҳам ҳар қандай рақибга қарши тура оладиган ажойиб ҳимоячилардир», — деди де ла Фуэнте.

Криштиану Роналду ЖЧ-2026 турнирида аллақачон 4 та ўйинда майдонга тушиб, ўз ҳисобига 3 та гол ёздириб қўйишга улгурди.