Ispaniya terma jamoasi bosh murabbiyi Luis de la Fuente bo‘lajak Jahon chempionati 1/8 final uchrashuvida Krishtianu Ronalduni kim va qanday to‘xtatib qolishi haqidagi savolga javob berdi.
Ispaniya va Portugaliya terma jamoalari o‘rtasidagi bahs dushanba, 6 iyul kuni bo‘lib o‘tadi. O‘yin Toshkent vaqti bilan soat 00:00da boshlanishi rejalashtirilgan. Matbuot anjumani davomida jurnalistlar ispaniyalik mutaxassisdan Pau Kubarsi va undan 22 yosh katta bo‘lgan Ronaldu o‘rtasidagi to‘qnashuvdan nimalar kutayotgani haqida so‘rashdi.
«Raqibing Ronaldu bo‘lsa, o‘zingni xotirjam his qila olmaysan, biroq men himoyachilarimga to‘liq ishonaman. Eng muhimi — har ikkala jarima maydonchasi ichida ham raqibdan ustun bo‘lish, chunki o‘yinlar taqdiri aynan o‘sha yerda hal bo‘ladi. Kubarsi bo‘ladimi yoki Laport, ikkalasi ham har qanday raqibga qarshi tura oladigan ajoyib himoyachilardir», — dedi de la Fuente.
Krishtianu Ronaldu JCH-2026 turnirida allaqachon 4 ta o‘yinda maydonga tushib, o‘z hisobiga 3 ta gol yozdirib qo‘yishga ulgurdi.
