Германия терма жамоаси таркибида 2014 йилги Жаҳон чемпиони Тони Кроос ҳужумчи Криштиану Роналду миллий жамоадаги фаолиятини якунлаганини эълон қилганидан сўнг, Португалия терма жамоасининг келажаги ҳақида гапирди.
«Биринчи навбатда, Португалияни табриклайман. Агар мақсад Криштиану Роналдусиз олдинга ҳаракат қилиш бўлган бўлса, сиз бунга эришдингиз. Йиллар давомида айнан Криштиану туфайли Португалияда қийинчиликлар юзага келаётганини таъкидлаб келишди. Бошқалар эса усиз жамоа яхшироқ бўлишини ёки у билан ва усиз ўйин ўртасида ҳеч қандай фарқ йўқлигини даъво қилишди. Жуда яхши — энди улар буни амалда исботлашлари керак бўлади.
Шу дақиқадан бошлаб жамоага Криштиану кетганидан кейин нималарга эришишига қараб баҳо берилади. Агар улар ҳақиқатан ҳам Роналду уларни орқага тортганига ишонишган бўлса, унда энди кейинги Европа чемпионатида ғолиб чиқишга ва кейинги Жаҳон чемпионатларида ғалаба учун жиддий курашишга мажбурдирлар. Футбол қонунлари шундай: сўзларни натижалар билан исботлаш керак. Барчамиз биламизки, Роналду Португалия футболи менталитетини ўзгартиришда улкан рол ўйнаган ва мамлакат тарихидаги энг муҳим совринларни қўлга киритишга ёрдам берган.
Энди Криштиану атрофидаги баҳслар ортда қолди. Бутун диққат-эътибор ҳозирги футболчилар авлодига қаратилган. Уларга сўзларига қараб эмас, қўлга киритилган совринларига қараб баҳо беришади. Футбол баҳоналарни эмас, унвонларни эслаб қолади», — деди Кроос «Einfach mal Luppen» подкастида.
