Норвегия терма жамоаси футболчилари хоналарнинг тозаланмагани ва яқин атрофдаги қурилиш майдончасидан чиқаётган шовқинлардан шикоят қилгач, Жаҳон чемпионатининг Англияга қарши чорак финал учрашуви олдидан кутилмаганда меҳмонхонани ўзгартирди.
Норвегия футбол терма жамоаси душанба куни тушдан кейин Майамига етиб келди ва полиция кузатувида Майами яқинидаги Форт-Лодердейлда жойлашган «Далмар» меҳмонхонасига жойлашди. ФИФА ходимлари, меҳмонхона маъмурияти, йигирмага яқин полициячи ва бир нечта меҳмонлар у ерда Эрлинг Холанд ва унинг жамоасини кутиб олишди. Бироқ Норвегия делегациясининг бу меҳмонхонадаги тунаши узоққа чўзилмади — атиги бир кун ўтиб, терма жамоа меҳмонхонани ўзгартиришга қарор қилди.
Норвегиянинг TV2.no нашри ҳафта бошида ушбу меҳмонхонага ташриф буюриб, унинг жуда гавжум йўл ёқасида жойлашганини хабар қилди. Меҳмонхона яқинида катта қурилиш майдончаси бор эди, соҳилга етиб бориш учун эса деярли тўрт километр пиёда юриш керак бўлган. NRK телеканали маълумотларига кўра, футболчиларга ажратилган бир нечта хонада ёқимсиз тутун ҳиди келган, моғор босган ёки улар етарлича тозаланмаган.
