Аргентина терма жамоаси ҳимоячиси Лисандро Мартинес Жаҳон чемпионати — 2026 чорак финалидан ўрин олган Швейцарияга қарши бўлажак учрашувдан кутаётган умидлари билан ўртоқлашди.

«Биз учун барча ўйинлар оғир кечди ва эртага бизни яна бир қийин баҳс кутмоқда. Швейцария Колумбиядан заиф эмас. Менинг фикримча, Колумбия билан ўйинда швейцарияликлар бутун учрашув давомида устунлик қилишди. Бизни ажойиб ўйин кутмоқда. Биз тайёрмиз», — Мартинеснинг сўзларини келтиради ESPN.

Жаҳон чемпионатининг 1/8 финалида Аргентина терма жамоаси Мисрни мағлуб этганди (3:2), Швейцария эса пенальтилар сериясида Колумбия тўсиғидан ўтган эди (0:0, пенальтилар бўйича — 4:3).

Аргентина — Швейцария чорак финал учрашуви 12 июль куни бўлиб ўтади. Ҳакамнинг ўйин бошланишини билдирувчи ҳуштаги Тошент вақти билан соат 06:00да чалинади.