Аргентина футбол ассоциацияси ЖЧ-2026 1/8 финали доирасидаги Мисрга қарши ўйиндаги ҳакамлик танқид қилинган хатлар журналистларга жўнатилганидан сўнг, ўзининг расмий аккаунтларидан бири бузиб кирилган бўлиши мумкинлигини маълум қилди. Бу ҳақда The Independent нашри хабар бермоқда.
Тарқатилган хабарларда «Аргентина ғалаба қозонмагани», учрашув натижасига эса «ҳакамларнинг коррупциялашган қарорлари» таъсир кўрсатгани таъкидланган. Шунингдек, мактубларда Миср терма жамоасининг кучли ўйини эътироф этилган.
«Бизнинг расмий аккаунтларимиздан бири орқали бизнинг жамоамиз томонидан ёзилмаган ва тасдиқланмаган хатлар жўнатилган бўлиши мумкинлигини аниқладик. Ҳозирда текширув ўтказмоқдамиз ва зарур хавфсизлик чораларини кўряпмиз», — дейилади федерация баёнотида.
Аргентина – Миср учрашуви амалдаги жаҳон чемпионларининг 3:2 ҳисобидаги ғалабаси билан якунланган эди, бироқ мисрликларнинг бекор қилинган голи ҳамда Энцо Фернандес гол уришидан олдин содир бўлган қоидабузарлик вазияти туфайли баҳс-мунозараларга сабаб бўлди. Миср томони аллақачон ФИФАга шикоят йўллаб, бош ҳакам Франсуа Летексьени турнирдаги кейинги ўйинлардан четлатишни талаб қилган.
