Испания терма жамоаси ва Мадриднинг «Реал» клуби собиқ дарвозабони Икер Касильяс ўзига ўхшаш дарвозабонлар ҳақида фикр билдирди.

L’Equipe нашрининг «Сиз ўзингизни замонавий дарвозабонлардан қай бири билан солиштира оласиз?» деган саволига Касильяс қуйидагича жавоб берди:

«Эҳтимол, «Барселона»дан Жоан Гарсия билан. Ёки ҳатто Давид Райя билан. Улар баланд бўйли дарвозабонлар тоифасига кирмайди (мос равишда 193 ва 186 см), айниқса, Жанлуиджи Доннарумма, Тибо Куртуа ёки Мануэль Нойер (196, 199 ва 193 см) билан солиштирганда. Лекин улар жуда чаққон ва тезкор».

«Мен учун доимо зарбаларни қайтаришдаги тезлик ажралиб турадиган жиҳат бўлган. Мен баланд бўйли дарвозабон бўлмаганман, бўйим 185 см. Мен катта гавдали бўлмаганман, лекин бўйимдаги камчиликни тезлигим билан қоплаганман», — деб таъкидлади собиқ футболчи.

Касильяс фаолиятини 2020 йилда якунлаган. Унинг ҳисобида 2 та Европа чемпионати ва 1 та жаҳон чемпионати ғолиблиги, шунингдек, «Реал» билан 18 та ва «Порту» билан 4 та турли совринлар бор.