2010 йилда Испания терма жамоаси ўз тарихида биринчи ва ҳозирча ягона марта жаҳон чемпиони бўлган эди. Нидерландияга қарши кечган финал учрашувида драматик бир вазият юз берганди — Арьен Роббен Икер Касильяс билан бирга-бир вазиятга чиқиб борган ва... дарвозани нишонга ола билмаганди. Испания терма жамоасининг собиқ дарвозабони ўша дамларни эслаб, Роббен уни алдаб ўтишига ишонганини айтди.
«Мен Роббенни алдаб ўтади деб ўйлагандим, аммо у энг ёмон қарорни танлади — зарба беришга қарор қилди. Агар у гол урганида, ўйин бошқача тус оларди ва якуни ҳам бошқача бўларди», — дея Касильяснинг сўзларини келтиради derbyderbyderby.it.
Эслатиб ўтамиз, жорий мундиалнинг ярим финалида испанияликлар французларга қарши баҳс олиб боришади.
